政壇：環境局二當家敲定
新一屆政府早前公布咗民政事務局副局長許曉暉、財經事務及庫務局副局長梁鳳儀後，環境局都傳出揀副局長嘅消息，據聞兩個候選人分別係世界自然基金會香港分會氣候項目主管余遠騁，及港大傳訊及公共事務處高級經理何建宗，當中又以何建宗機會較大。
環境局局長黃錦星上次洩露政府新班子名單嘅公布日期，尋日又爆料話揀定副局長，佢盛讚余遠騁同何建宗兩個都係有心有力，仲話最關鍵係考慮對方能否同佢互相配合、互相補足喎。問番當事人，余遠騁話「無消息！」更暗示可能唔係佢做。至於何建宗就話：「依家唔方便講，等正式公布！」然後就匆匆收線。另外，教育局副局長亦傳出疑似人選係現時教育局副秘書長陳嘉琪，真唔真？相信好快就知道。
早前笑眯眯去候任特首辦面試的余遠騁昨日僅低調回應指無消息透露。（資料圖片）