政壇：新任局長大比併

新一屆政府上場之後，由於立法會會期未完，啲新丁局長即刻就要投入工作，尋日就有三個局長喺第二個工作天落去立法會接受挑戰，啱啱接手，啲議員都唔敢要求咁高，但一日比併落嚟，都可以睇到啲新丁局長表現頗參差，食物及衞生局局長高永文獲得較多好評，環境局局長黃錦星（KS）就要睇貓紙、背答案過骨，做過常秘嘅發展局局長麥齊光都畀啲問題搞到氣咳。

首次出席立法會大會接受議員質詢嘅新丁中，竟然以一上任就畀人質疑涉及僭建嘅高永文表現最淡定，而且獲得議員最多讚好，工聯會葉偉明話，可能因為高醫生以前做醫管局行政總裁時都有去吓立法會開會，所以表現都算唔錯。

至於黃錦星，回應質詢時基本上只係照稿讀，表現唔算突出，建仔嘅克勤都話，KS雖然四平八穩，但都要加把勁刨熟啲環境政策至得，話晒堂堂局長冇可能成日睇貓紙㗎？不過，KS新官上任仲未三把火，已經成為網民搞吓創作嘅對象，有人將佢張相同清朝末代皇帝溥儀放埋一齊，畀人睇吓佢哋嘅相似程度，網民搵嘅相係溥儀青春時期嘅相，同中年嘅黃錦星似唔似真係言人人殊。

麥齊光答到氣咳

做咗多年公務員嘅麥齊光習慣咗立法會開會，尋日答問題時都似乎有啲挑戰，咳到無時停，連劉慧卿都要暫時收火叫佢保重。自由黨劉健儀更加話麥齊光讀稿慢，又話佢掌握唔到質詢嘅問題核心。

以政務司司長身份落立法會嘅林鄭月娥，尋日就畀大批記者包圍，現場秩序一度混亂，結果連掛喺走廊嘅歷任立法會主席其中一幅畫像都被撞歪。