SUN世代：鳥倦空姐 美容界再展翅

符芷晴（Kennis）喜愛旅遊，一畢業就考上了空中服務員，翱翔天際，世界之大，讓她目不暇給，還讓她遇上了真命天子，即使後來結婚生子，她仍沒有要降落地面的念頭，但人總有改變的時候︰「有一次飛咗去外地，突然間好想快啲返屋企。」八年來首次雙腳着地，不為棲息，而是要走更遠的路。

回歸陸地後，Kennis決定轉戰商界︰「唔想做全職家庭主婦，咪搵啲『細藝』，做自己鍾意做嘅嘢。」丈夫葉振國是榮興集團創辦人葉樹林之子，其實她大可以專心相夫教子，當個幸福少奶奶，然而她不願停下腳步︰「作為一個媽媽，都有諗過搞 playgroup，但我自己試過做激光美容，覺得有得做，所以最後係揀咗美容行業，始終女人都係貪靚。」

初次當起老闆娘，縱然對美容行業一竅不通，Kennis都不假手於人，由選址、市場定位到申請牌照，事事親力親為，即使在購入美容儀器時，需要朋友幫忙，她也會參與其中，從中學習︰「每部美容儀器都會有啲專業文件，我自己又唔識，好彩有位朋友係讀生物化學，佢幫咗我好多，仲教埋我睇。」正式購入儀器前，她更會親身試用，保證產品質素︰「自己試過覺得好先可以畀客人用，有次試機時，畀部機㷫親隻手，即刻唔買。」

北望神州 愈戰愈勇

兩個月後，Kennis 的美容店正式在銅鑼灣開業，並走高、中檔路線，但剛起步就遇上金融海嘯，她不禁質疑自己︰「係咪定位唔啱﹖」但她沒有因此而灰心，反而積極找朋友幫忙︰「第一批客人都係朋友，朋友再幫忙介紹畀佢哋嘅朋友，一個傳一個，建立口碑，真係好多謝佢哋。」自開業以來，Kennis堅持優良的服務質素，憑着信譽，客源愈來愈廣，即使經濟低迷，也能順利過渡。

「啲客人打嚟已經book唔到，我覺得我有責任。」一千呎的小天地，已逐漸容不下其美容事業，原本只想找「細藝」的她，也不禁想到要擴展業務︰「生意愈做愈大，我努力已經唔再淨係為自己，我都要為客人同員工着想。」於是，她將生意搬到一個七千呎的舖位，同時加入醫學美容概念，進一步擴闊美容事業版圖。

不少港人都北望神州，Kennis 也不例外，她直言未來會積極在大中華地區發展，第一站是北京︰「有個朋友嫁咗去北京，佢話如果我喺當地開分店，佢就唔使飛嚟飛去。」現時她每星期都會飛到北京，親自選址及評估競爭對手，更要處理繁複的文書工作，但她愈戰愈勇，樂觀地面對前景︰「有困難咪解決囉！」除了北京，Kennis 亦計劃在深圳及新加坡開設分店，為更多女性，完成美麗任務。

Kennis's Profile

婚姻狀況：已婚，育有三名子女

現  職：Dermaglow Limited董事