政壇：搞搞政：陳維安向吳文華取經

新一屆特區政府大換班，立法會遲吓嘅選舉料亦會大換班，不過，在議員之前搶先換班嘅係立法會秘書長人選。教育局前副局長陳維安（Kenneth）自願減人工出任該職位，上個禮拜立法會秘書處公布聘任結果後，佢都開始光明正大咁出入立法會，唔使再偷偷摸摸，尋日佢就走去向即將離任嘅立法會秘書長吳文華（Pauline）學吓嘢。

Kenneth話，佢正式上任日期係八月六日，所以尋日都係輕裝上陣，呔都冇打。過去四年做副局長嘅佢不時都會到立法會，對立法會程序都有一定了解。不過將來做秘書長，工作性質就好唔同，所以嚟緊呢個星期，佢都會落立法會跟住Pauline熟習吓運作，又承諾會不偏不倚咁為立法會主席提供程序上嘅意見，暑假將至，佢都會將勤補拙刨吓議事規則。

被問到點解肯自動減薪過檔立法會？Kenneth就話因為想吸取多啲經驗，同時希望畀自己一個好好嘅專業發展機會！咁係咪暗示做副局長無發展機會呢？