政壇：政商定格：港大穀倉舞會賀百周年
香港大學為延續成立百周年嘅喜悅，日前喺港大陸佑堂搞咗個懷舊Barn Dance（穀倉舞會），為港大獎學金基金籌得六十萬元。身為港大校友嘅前民政事務局常秘李麗娟（媽打）係舞會召集人之一。
呢一晚新舊校友盡興咁玩，港大校務委員會主席梁智鴻（金刀梁）一身「貓王」造型成為全場焦點，拎起個結他自彈自唱型到爆，唔少人都爭住同呢位「天王巨星」合照。同樣係港大校友嘅項明生（James）亦一身西部牛仔打扮維妙維肖，佢仲大爆媽打跳牛仔舞頂呱呱。太子珠寶鐘錶係晚會主要贊助機構。
項明生（左）同莊偉茵（右）不約而同着喇叭褲，老友Celine（中）都讚佢哋夠懷舊。
梁智鴻（右）扮貓王扮得入型入格。（受訪者提供）