政壇：老公遠走支持林鄭升官

出名「好打得」嘅政務司司長（CS）林鄭月娥日前先話過，出任呢個要職並唔係特首梁振英游說，而係佢丈夫，佢講嘅時候仲一臉柔情。尋日履新後，佢喺電台訪問中再講到老公，再講當年老公支持自己做高官嘅事。

林太老公林兆波有世界知名學府劍橋大學博士學位，曾經任教中大數學系，絕對稱得上係高級知識分子。當年林太為咗照顧一對喺英國讀書嘅乖仔節思及約希，有常秘唔做自願降級去駐倫敦經濟貿易辦事處做處長，佢老公當時亦辭埋中大數學系教席一齊去英國居住。林太尋日再透露，自己係小女人，○七年做發展局局長時亦問過老公意見，老公表示支持，仲用英文講咗句：「I would stay away from you」。

官運亨通嘅林太依家貴為特區第二把交椅，會唔會向第一位發展？佢即刻話，好享受做輔助角色，唔太喜歡做最高嘅領導位置喎。