政壇：四局長立會冧議員

特區新班子宣誓就任後，尋日係第一個工作日，一眾新官各有活動，有官員去電台博人氣，有官員就有團體示威請願，亦有四個新官不約而同去咗立法會，同一眾議員先「打招呼」博好感，同時了解吓立法會嘅運作。不過，快將任期屆滿嘅立法會議員就顯得唔得專心，朝早嘅會議唔止一次要響鐘召人返去開會，差啲又出醜啦！

尋日現身立法會嘅分別係運輸及房屋局局長張炳良及發展局局長麥齊光，首日「坐正」嘅保安局局長黎棟國都有出席，仲有教育局局長吳克儉都嚟立法會打關係。問責局長嘅主要工作之一就係同立法會打交道，四個局長將立法會列作第一站都係策略所在。不過，張炳良同麥齊光喺立法會職員陪同下參觀宴會廳、會議廳前廳等地方時，記者邀請麥齊光去會議廳外「練習」被傳媒採訪，佢就尷尬咁婉拒。

黎棟國坐正即解畫

黎棟國一坐正就要開會，仲要因應七一期間嘅警方保安問題解畫，佢話向市民作出報道係傳媒天職，又指本港傳媒敬業樂業、盡忠職守，當局會盡力協助傳媒採訪。佢講得好圓滑，圖為日前警方帶走記者事件消毒，又趁機向喺立法會採訪嘅傳媒示好。

同為新丁嘅吳克儉首日就掛住打關係，去立法會同教育界議員張文光會面，交換大家對教育政策嘅意見，張文光事後透露，佢哋見面三個鐘，仲形容對方「有誠意」添！