颱風送瘟神 貪曾衰收尾

曾蔭權爵士上任七年，禍港殃民，天怒人怨。今日佢正式滾蛋，颱風杜蘇芮「贈興」送佢一程，一時間烏雲蓋頂，狂風大作，唔通真係天有眼，幫香港送瘟神？

講到天怒人怨，真係冇誇張。嗱嗱嗱，煲呔曾假公濟私死性不改，棚尾拉箱仲狂搞政治酬庸，向自己友大派荷蘭水蓋。佢任內最後一次授勳，多名「曾朋友」榜上有名，唔理好醜，但求就手，大家圍威喂，如果話當中冇蠱惑，你信唔信吖？叮！

多行不義必自斃。煲呔曾為官無德，施政無能，上台七年毫無建樹，仲爆出連串貪腐醜聞，唔使等秋後算帳，早已蓋棺論定。當年吹住口哨入主禮賓府，佢嘅民望曾經高達七十幾分，點知高民望不過係虛火，好快就掉頭回落，高開低收，而且低處未算低，埋單計數，比董建華「腳痛」落台前仲低一大橛，簡直係衰到貼地。

呢，中大最新民調顯示，煲呔曾卸任前表現評分「滿江紅」，十個項目統統唔合格，其中九項評分仲低過前任，名副其實「衰過老董」。正所謂一語成讖，煲呔曾自稱視民意如浮雲，最後果然被民意唾棄，呢啲咪叫現眼報咯。

最過癮就係，所有項目中，煲呔曾「廉潔」評分最低，得三成幾，可見群眾眼睛雪亮，「香港第一貪」形象深入民心。咁又難怪嘅，佢被本報獨家踢爆連串貪腐醜聞，仲被審計署篤爆利用公帑周遊列國，唔豪唔遊，唔豪唔住，令香港廉潔形象一鋪清袋，佢自己就身敗名裂「衰收尾」，可謂一朝貪腐，遺臭萬年。

貪曾上台咁耐，香港衰足咁耐，貧富懸殊不斷惡化，堅尼系數冠絕全球；官商勾結達到極致，深層次矛盾有增無減；通脹肆虐，百物騰貴，基層市民苦不堪言。今日香港，無論社會、經濟或民生，統統畀貪曾搞到一鑊泡，仲留低一堆政治地雷畀下屆政府，真係害人害物。

善有善報，惡有惡報，時候一到，統統都報。煲呔曾下台之日，就係秋後算帳之時，如果佢以為拍拍屁股走人，就可以逍遙法外，咁就大錯特錯嘞。正如老毛話齋，「借問瘟君欲何往，紙船明燭照天燒」，廉署隨時請佢飲咖啡，老天爺亦唔會放過佢，煲呔曾，一路好走，睇路吖，叮！