政壇：搞搞政：貪曾收檔懶理排長龍

做埋今日就收檔嘅曾蔭權爆出連場貪腐醜聞後，更加正事唔理，早前先畀我哋踢爆完全懶理回歸十五周年嘅準備活動，尋日就搞出單千人排長龍事件，受害者包括前天文台台長林超英（黑英），尋日因為要排隊攞證，連出席自己身兼校董嘅學校畢業禮都要遲到。

話說民政事務局及總署有份負責統籌回歸各項活動，包括今晚特區政府歡迎晚宴及明日七一就職禮，早前透過電郵方式核實地區人士及區議員是否出席活動，點知官方電腦畀黑客入侵，假冒官方發放電郵予地區人士，當局收唔到回覆，安排失算遭受影響嘅地區人士投訴，當局事後就黑客入侵報警處理，但將事件隱瞞公眾，改為以郵寄方式通知地區人士到所屬地區指定地點索取入場證件，點知衰開有條路，講好本月二十七號至二十九號一連三日到指定地點攞准許入場證，但好多地區人士到二十八號先至收到信件，結果尋日本港唔同地點都有成千人大排長龍，人人怨聲載道。

黑英話佢係天水圍某間學校嘅校董，尋日學校舉行畢業典禮，佢一早約好教育局常秘謝凌潔貞做嘉賓，點知自己卻遇咗咁嘅事，黑英怒氣沖沖話：「我請人哋嚟，人哋嚟咗我就唔喺度，唔好意思o架嘛！」