政壇：黃宏發企兩粒鐘影玉照
立法會新大樓入伙後，會議廳外走廊牆上掛咗歷屆立法會主席嘅油畫，不過咁耐只見現屆主席曾鈺成同前主席范徐麗泰兩幅油畫，到前晚先新增咗立法局年代嘅兩位前主席施偉賢爵士同黃宏發（Andrew）嘅肖像，尋日仲請Andrew同佢太太到立法會食飯。Andrew話，影呢幅相時，中環舊立法會大樓入面已經拆咗，所以惟有喺大樓出面影，為咗影相畀立法會畫呢幅油畫，佢企咗成兩個鐘，擰來擰去擺甫士，都咪話唔攰。
立法會秘書長吳文華就話，其實喺搬去添馬艦新大樓前，已經諗住喺會議廳外掛上歷屆主席嘅油畫，但因為施偉賢身處海外，約咗佢成年佢都唔得閒，惟有搵番政府新聞處啲舊相去畫呢幅油畫，至於Andrew就喺大約半年前先約到時間影相。
黃宏發帶太太到立法會新大樓參觀自己嘅肖像。