政壇：葉劉唔信秋後算帳

新一屆政府尋日公布行政會議成員名單，之前熱傳有份入行會嘅新民黨主席葉劉淑儀竟然名落孫山，反而脫離政壇新人身份冇耐嘅建仔李慧琼就成為行會一員，真係跌爛唔少眼鏡，更隨即成為政圈嘅笑談。曾經戲言位至政務司司長嘅林鄭月娥係「妹妹」嘅葉劉，今次眼白白睇住另一個妹妹李慧琼走入行會大宅門，佢就繼續喺門外捱騾仔，唔激到喊都好難囉！

自嘲冇大黨照

尋日行會名單公布後，政圈議論紛紛，新行會嘅人數雖然多過以前，但大家嘅感覺卻係分量反而輕咗，出人意表嘅係，本嚟盛傳會入圍嘅葉劉竟然冇份，反而建仔嘅李慧琼就一躍進入本港管治核心嘅殿堂，

葉劉回應冇份入行會時話並冇失望，但就透露自己早喺五月就接到梁振英邀請，佢亦都接受咗。不過，最近佢又收到通知，立法會議員要到九月先獲委任入行會，呢段時間發生咗乜事﹖咪就係早前立法會就架構改組決議案係咪優先傾，葉劉投下棄權票囉，不過葉劉話：「我唔揣測點解，亦唔相信會有秋後算帳。」

但係同為立法會議員嘅李慧琼入咗喎？葉劉就酸咪咪咁話：「梁振英可能覺得李慧琼一定可以當選下屆立法會囉，我就未必！」何況，李慧琼有個大黨支持，佢自己就係立法會嘅一人黨，言下之意係李慧琼入行會係因為有大黨照住，單打獨鬥就唔知喇。

早前因為政務官師妹林鄭月娥傳為政務司司長大熱，葉劉先氣頂在心，好風涼咁話「唔會返去跟『妹妹』」，言下之意係大師姐顏面何存呢﹖家吓立法會又有妹妹仔李慧琼爬佢頭入行會，葉劉呢啖氣真係唔易落。