貪曾房策缺失 蝸居蟻民缺宅

語言係時代嘅精神符號，係社會嘅變遷紀錄。曾蔭權主政七年，又留低乜嘢時代語言畀大家呢？多咯，「第一貪官」、「香港和珅」、「歎盡呢份工」……簡直將貪曾嘅貪腐面目描畫得淋漓盡致。

至於講到貪曾施政無能、禍港殃民咯喎，就不得不提呢兩個詞語嘞，就係……「劏房」同「棺材房」！一語勝千言，呢兩個新詞可以話道盡貪曾治下一代香港人嘅辛酸同無奈。

劏房同棺材房係點樣成為貪曾時代嘅特產，相信都唔使太一叮縷述咯，年年上街抗議嘅無殼蝸牛已經一把眼淚、一腔怒火咁講晒畀大家聽。今日只係同大家分享一個數字啫，就係貪曾執政七年，劏房數目已急增至超過十萬個，叮！

十萬個劏房，數字背後代表咗乜嘢？代表草根階層喺極之差劣嘅生活環境掙扎求存，代表不計其數嘅蟻民百姓被迫喺危機四伏嘅陋室惶恐過活。留意喎，十萬之數只係講緊劏房，環境比劏房惡劣嘅棺材房同籠屋更加不計其數。所以話，港式貧民窟遍地開花，呢個係香港之恥，更加係貪曾之恥！

學者批評，貪曾在任七年搞到香港房屋一鑊泡，整個香港要為佢一個人嘅錯誤付出沉重代價。其實正確啲講，香港房策一塌糊塗，點止因為佢嘅缺失，更加源於佢嘅貪腐。過去七年港府房策擇惡固執，對增加土地供應、復建居屋拖得就拖，對豪宅規管似有若無，卒之搞到樓價租金失控狂飆高與天齊，話無「曾商勾結」利益輸送，講都無人信啦。

貪曾蔭權貴，蟻民住陋房。嗱，以後劏房多咗一層含意，就係貪曾腐敗無能，市民任人宰割！而棺材房咯喎，就寓意香港權財勾結，廉潔失落，唔撥亂反正遲早死路一條。

講開香港人嘅缺宅困局，等太一叮再講多個數字畀大家聽啦。公屋輪候申請個案已經由○七年十一萬零八百宗，增至去年底十七萬六千宗，意味住大批無殼蝸牛上樓遙遙無期。私樓買唔起，公屋難上樓，港人嘅住屋噩夢何止十萬個，貪曾嘅遺害又何止在位呢七年呢？

貪曾講過，香港不存在無瓦遮頭問題。對佢嚟講，外訪遊埠住總統套房，下台退休一度計劃入住深圳禮賓府，連即將進駐嘅前任特首辦公室都闊落過人，單係酒窖已經大到可以擺放二千支心愛紅酒，試問呢個世界邊有居住嘅問題呢？咁啦，到佢被廉署請去飲咖啡，可能就會驚斗室牢獄唔夠寬敞嘞，叮！