政壇:搞搞政:波波英文渣搵女友打救

由出身基層嘅普通人搖身成為特首嘅CY梁振英,充分體現到不斷打拚嘅獅子山下精神。一直支持CY、盛傳出任副財政司司長嘅立法會議員「波波」陳茂波尋日接受電台訪問,話細個住喺石硤尾木屋區,家境同CY一樣咁貧窮,當時佢除要接受外界助養外,中學時仲要喺製衣廠做雜工幫補家計。

波波話當年讀中文中學,原本同其他同學一樣對英文非常抗拒,但出嚟做嘢後至知道英文對事業發展好緊要,於是就特登去夜校進修惡補英文。後來佢轉咗去建造業訓練局做秘書長兼會計主任,當時要用英文寫會議紀錄,但佢啲英文畀人改完又改,佢惟有硬住頭皮搵喺聖士提反女子中學畢業嘅女朋友、即現任太太幫佢改會議紀錄。佢笑住話當時追緊女仔,但竟掉番轉頭請教女朋友,搞到佢好冇面喎!

未宣布參選前,CY成日問香港青年愈來愈窮點算,佢好快就上場嘞,唔知可唔可以影印多幾個佢同波波呢啲香港故事呢?

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報

設計圖片及對白