政壇:發叔畀海外僑領鬧軟弱

發展局局長林鄭早排發表終結丁權論,引起新界原居民強烈反彈,雖然事後急補鑊,話只係佢個人諗法,政府從冇就呢方面研究,但近二十個海外原居民僑領近日去信新界鄉議局主席劉皇發,話好多原居民都覺得,發叔喺終結丁權呢件事上太過軟弱,做事唔夠硬淨,對政府又處處忍讓,凡此種種令鄉民對發叔有好多怨言。佢哋仲質問發叔,到底怕啲乜?唔通係怕北京政府,所以寧願犧牲原居民利益,都要阻止佢哋發起大型抗爭行動?

封信仲要求發叔唔該盡早辭去行政會議成員,企喺新界人一邊,同政府抗爭到底。不過咁,我哋最近收到消息,話發叔對係咪留喺行會有好大猶疑,當中好大部分原因係「私人理由」,如果消息真確嘅話,佢行會任期得番幾日,辭唔辭影響都唔大。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報