政壇：雷曼報告薄夾貴冇人吼
立法會成立專責委員會調查社會關注嘅事件，調查完成後都會出一份報告，供公眾購買。我哋最近比較過新鮮出爐嘅研究雷曼兄弟迷債報告，同搞咗好耐嘅梁展文事件報告，發現梁展文報告重一千四百克，厚四百幾頁，都只係賣一百四十八蚊，但新上架嘅雷曼報告，只係得三百六十幾頁，重一千二百幾克，但唔知點解售價係最貴，賣成一百九十八蚊。唔知係咪因為雷曼報告又薄又貴，職員同我哋講報告到依家仲未發市。
問過秘書處對報告嘅定價規定，答案係根據佢哋印刷數量嚟定價，即印得愈多賣得愈平。其實呢啲報告全部都有上網，唔需擁有一本白紙黑字報告嘅市民，上網睇就得啦！
報告除咗有印刷版同上網版，仲有光碟添。