政壇：葉偉明廁紙筒急市民所急
臨近九月立法會選舉，各黨派參選人都會向選民派發各類物品做宣傳。近日網上流傳一幅印有工聯會議員葉偉明肖像嘅廁紙筒相片，最初仲以為係有人惡搞，一問之下原來係真嘅。
葉偉明嚟緊有意由勞工界功能界別轉戰新界東直選，面對多名泛民主派同建制派對手，自然要博出位搞搞新意思。佢話呢個廁紙筒已整咗一段時間，唔係專為選舉而整，整咗幾多個同用咗幾多錢都已經唔記得嘞！
會唔會覺得尷尬同核突呀？佢話廁紙筒唔一定係放喺廁所，擺喺客廳、飯廳用嚟抹吓嘴都得，就算真係有選民用嚟解決大小二事，佢都絕對唔介意，認為咁至證明佢係「急市民所急」，幫到市民。
