政壇：邱騰華偽保育 毁沙螺洞生態

究竟喺香港呢個石屎森林做環境保護工作嘅人點諗？天文台前台長「黑英」林超英就話：「非常氣餒！」

今次搞到黑英好氣餒嘅，係環境局唔理環保團體建議，喺大埔八仙嶺郊野公園沙螺洞硬推撥四公頃官地興建六萬個龕位。沙螺洞係八仙嶺嘅心臟地帶，入面一片稀有樹林濕地係好多珍貴生物嘅棲息地，生態價值僅次米埔。黑英同多個環保團體因擔心龕位工程會破壞當地生態，一早就建議環境局採等價地換地嘅方法，一來可以將沙螺洞納入八仙嶺郊野公園，二來亦可以解決發展商冇地發展嘅問題。

黑英十個讚贈規劃署

黑英話呢個建議遇上極大嘅阻力同反對，眼見環境局挾「自然保育」之名，支持發展商喺沙螺洞生態價值最大嘅位置建六萬龕位，認真相當諷刺。好明顯，矛頭直指局長邱騰華，炮轟佢竟然背道而馳，破壞大自然。

其實沙螺洞唔係首次捲入「被發展」嘅危機，但之前每次都逢凶化吉，至於今次嘅結果係點，就要睇吓今日嘅環評報告傾成點嘞。之前已有環保團體質疑局方喺發展商提交環評報告公眾諮詢期後四日就即開會審議，根本不足以組織意見，只為快刀斬亂麻，黑英仲講到明睇吓場鬧劇點收科。

環境局講一套做一套，但規劃署最近就從善如流吸納咗保育塱原自然風貌嘅意見，宣布修訂粉嶺古洞北嘅發展藍圖，將塱原最重要嘅部分劃為「自然公園」同「農地」，叫做為香港留下一片大自然樂土，就連黑英都話規劃署今次「虛懷若谷」為港人造福。不過，黑英呢頭畀完「十個讚」規劃署，嗰頭就感嘆世上仍然有人對自然保育無動於衷。