古諮會被擺上枱 保育變政治鬧劇

港府最鍾意吹水乜乜之都，可惜十有八九都係作大。不過咁，講到鬧劇層出不窮咯喎，香港認第二冇人敢認第一，叫「鬧劇之都」當之無愧o架。

又有好戲登場喇，今次呢齣叫「保育者自身難保」，劇情係清拆舊政府總部西座引發政治風波，搞到古物諮詢委員會威脅集體劈炮。話說主席陳智思唔願繼續做箭靶，率先請辭，委員聯署挽留，其中多人表明會同主席共同進退，有人更將事件形容為「文革式批鬥」。

嘩，香港搞文革，好大劑啫。講嚟講去，都係港府累人累物，企硬要清拆西座，古諮會無端端做咗炮灰，公信力備受質疑，陳智思更被指同當局打籠通，意興闌珊，惟有一走了之。古諮會群龍無首，隨時散Band，保育者自身難保，你話係咪搞笑呀？

講真，保育歷史建築冇人會反對，問題係，邊座建築物應該保留，邊座建築物可以拆，見仁見智，難有共識。政府山西座就係典型例子，港府話拆得，環保團體話唔拆得，根本雞同鴨講，口同鼻拗，點可能有共識吖。

最離譜嘅係，跛腳鴨政府行將就木，忽然玩霸王硬上弓，無端端點起火頭，簡直添煩添亂。香港社會本來已經高度政治化，西座嘅保育爭議被無限上綱，最終演變成政治鬧劇，當局係始作俑者。最縮骨嘅係，當局點起火頭，將古諮會擺上枱，自己就隔岸觀火，好似完全唔關佢哋事咁，豈有此理！

講開又講，何謂歷史建築，有冇保育價值，從來都係公說公有理，婆說婆有理，冇一把尺可以量度。不過咁，雖然話評估古蹟無絕對客觀嘅標準，但當局至少應該解釋畀市民知，保育嘅方向係乜，目標係乜，點樣保護至得o架。

弊在當局將保育當做騷，根本冇明確目標，一遇到爭拗就進退失據，從天星碼頭、皇后碼頭、灣仔喜帖街，到景賢里、何東花園，再到今次政府山西座，鋪鋪都搞到滿城風雨，問你服未！

講到尾，古諮會只負責為歷史建築評級，同政治完全扯唔上關係，所有決定權都喺當局手上。政府山西座嘅保育爭議演變成政治鬧劇，古諮會唔止被擺上枱，仲廢埋武功，特衰政府認真好帶挈，叮！