SUN微博：阿爺人未到，糖先派！

世上，每逢任何工作交替接班，因雙方辦事態度、手法、習慣或見解不同，或多或少總不能百分百順暢，少許沙石避不了，公廁阿叔新上任，都會咁o架啦！正常過正常啫！只要上手真心移交給下手，一定沒有解決不了的困難；問題是，上一手的是乜料子嘅人，賤無倫吖？愛玩嘢？定係弄權契弟？咁！接手的，就苦過弟弟也！

睇候任特首振英哥近日的疲態窘相，真係人見人憐，唔單止眼肚浮腫，直追佢嘅恩公老董，連原本濃密的烏黑華髮也露花白，兼開始M形發展，同佢官運相稱，節節上升！慘爆！

振英哥不特只容顏走樣，連平常機鋒縝密的講話，也前後不一，自相矛盾，本以為佢太攰，精神出現問題，但據政情探子報告，原來事出有因：

早前，振英哥公開話過佢未正式揸莊，沒有政府的真確數據資料，所以不能作任何保證及評論；不到三日，佢突然撲出嚟，話留意到香港貧富懸殊惡化，不能再等（即使仲有兩星期先到佢話事），現親任主席，成立扶貧會做窮人的救世主，點解佢言論一時一樣，轉軚咁快嘅？探子收到風，話阿爺七一來港主持回歸十五周年大典，不想見到有五十萬人上街招待佢嘅場面，為減人數，振英只能用僅餘的日子做工作，出口術派糖乃最無成本而可能有效的手段，遂不計以前講過乜，先搞掂主子的吩咐柯打至為重要，做細嘅係咁o架啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府

email：sunweibo@opg.com.hk

「就係咁爆」網址：tv.on.cc/hot