政壇：陳惠仁夢想開古書館

日前見到私人投資公司Chartwell Capital創辦人兼投資總監、促進教育基金會副主席Ronald陳惠仁喺中環某書店聚精會神咁睇書，又同店主Lorence Johnston交流，原來佢研究緊嘅係價值連城嘅古書，本本值千金。佢話七年前已開始收藏古書，原因唔係為博升值賺錢，而係想保存古人嘅智慧喎！

佢首本收藏嘅係已故英國首相邱吉爾嘅著作，皆因佢好崇拜邱吉爾，不時買佢嘅相片、用過嘅筆等，為進一步窺探邱吉爾嘅內心世界，於是買下佢嘅著作，買埋買埋，至今收藏近二百本古書。佢最愛嘅珍藏之一，係一七九七年出版、一套三冊嘅《英使馬嘎爾尼訪華檔案史料匯編》，係英國特使馬嘎爾尼首次訪華後，返回英國所寫嘅見聞錄，彌足珍貴。

講到最想擁有嘅書籍，佢話係四十二冊《康熙字典》，中國人雖然發明印刷及造紙，但保存技術做得唔好，要搵完整嘅中國歷史書都好困難。至於佢嘅終極目標，就係創立一間古書圖書館，供學者參考。