政壇：D姐盼享受平民生活

尋日係公務員事務局局長「D姐」俞宗怡任職公務三十八年零十日，佢罕有同傳媒茶敍，仲講到明唔會留任下屆政府。D姐退休後最想做啲乜嘢？竟然係去搭「三碌拎」。

D姐喺七一後會先清晒之前儲落近一年嘅大假，之後先正式退休，未有計劃做任何受薪工作，話會先好好享受平民生活。佢嘅「平民生活」清單仲有去迪士尼，同自佢做完學生妹後都冇去過嘅海洋公園，同埋去睇吓電影早場。

問佢最近煲呔曾連串嘅貪盡海陸空事件會唔會動搖公務員士氣？佢就話公務員嘅工作係點，相信「好鍾意旅遊」嘅香港人自然心中有數。事關去得多旅行，親身體會外國嘅行政效率，就自然會知香港好。D姐一語道出港人愛旅遊，竟同貪曾愛旅遊呢個前提互相呼應。

船行萬里，亦有到岸時，D姐話唔想好似「鬼船」咁「飄吓飄吓」，所以都係時候退下來。既然都到岸，唔知D姐會唔會泊埋個好碼頭呢？