政壇：豬尾骨 豬筒骨考起周一鑊

有「每周一鑊」之稱嘅食衞局局長周一嶽，早前喺某晚宴爆響口，話下屆局長喺席間，換言之自爆下屆政府冇預佢。既然佢冇得撈咯，平時經常批評佢嘅議員就更加當佢冇到，仲向佢嘅醫科專業埋手。

答質詢大耍官腔

消委會喺上月中發表有關豬肉售價嘅研究指出，新鮮豬肉平均批發價同零售價調整步伐唔一致，零售價唔單止加快減慢，甚至出現批發價下調而零售價反升嘅情況。依家通脹高企，豬肉零售價升即係基層市民要捱貴肉喇，真係百上加斤o架！

話說尋日立法會大會有條質詢問豬肉價格點解咁貴，負責回應質詢嘅周一鑊亦早有準備，但噏完一大輪，都只係耍官腔。

眾所周知，周一鑊本身係骨科醫生，唔知係有心抑或無意，有議員追問佢識唔識分豬尾骨同豬筒骨。因為有啲超市魚目混珠，好蠱惑將賤價嘅豬筒骨當貴價嘅豬尾骨出售，要求當局杜絕呢啲欺騙行為。

呢條問題問得咁騎呢，擺明係踩周一鑊，仲揶揄周一鑊係豬肉佬啦！周一鑊當然聽得好明白，跟住就反擊話自己唔係獸醫，佢對動物骨骼唔係好熟，所以唔識分。

提出質詢嘅民協馮檢基就問，點解豬隻批發價平，但零售價反而貴呢？呢樣周一鑊就識答，佢話一隻豬唔止有豬肉，仲有內臟、骨頭同肥肉，扣除晒呢啲，剩番嘅豬肉可能會貴咗，總之價格由市場自由釐定喎！