SUN微博：打橫嚟講：明天點會好？

從種種客觀事實顯示，新一屆政府未來的路，肯定不好走。

候任特區首長未埋位，已被標籤為「低民望、低支持」和「低公信力」之「三低人士」，仲未計「低票數」，只得689票的小圈子選舉產成的非一人一票真民主選舉的特首，認受性不高之下，還受反對派（不一定是泛民的，因建制派的陽奉陰違更要命呀！）的諸多阻撓，窒頭窒勢，搞寸party；咁未算pk，內部亦七國咁亂，倒瀉籮蟹，勿說要向中央阿爺交代講到咁遠，就是同近近地嘅「西環」匯報，也一頭煙啦！

家陣，連招聘幾件茄喱啡塞滿新班子的空缺，都一鑊泡！呢頭要留位畀「自己人」，嗰頭羅范又同人「開片」，日日炒大鑊，形象大壞，和諧無望；而那班應徵者，有如去砵蘭街揼骨般鬼祟，將件好事搞到醜態百出，正常好人都唔嚟做啦！

新班子已經唔夠人啦！現職的政治助理卻喺呢個critical moment高調宣告唔跟新特首玩落去，擺明拆枱腳，無建設之餘，仲要搞破壞，落井下石，驚死振英哥唔夠煩，臨尾送佢一程。

仲有十日，呢度976平方公里，都係振英哥嘅主場，場內剩得一個清一色嘅梁營揸莊，七百萬人嘅福祉，押落咁嘅政府手上，陪跑艱辛險路，肯定的了！

寄望振英哥為人們帶來幸福愉快的生活？哈哈！炒咗那件羅范先啦！佢愈來愈令人厭惡呢！咁都做唔到，其他嘅嘢，咪旨意咯！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府

email：sunweibo@opg.com.hk

「就係敢爆」網址tv.on.cc/hot