政壇：政商定格：李文俊接百仁主席傳善心
匯聚城中富二代嘅「百仁基金」，前晚喺中環五稜會舉行周年會員大會，理文造紙太子爺李文俊（Raymond）當選新一屆主席，現屆主席施榮忻（Jaime）將於六月尾卸任，呢一晚新舊主席好似接棒咁。
Raymond話，接過百仁基金的重任後預咗忙上加忙，佢預備深入基層，了解市民真正需要喎。佢仲決定為「百仁」成立顧問局，將歷屆主席納入其中，並由創會主席李家傑任顧問局主席。
百仁基金會員呢一晚都熱烈捧場，女將包括有中藥公司太子女王文博、羅氏針織太子女羅穎怡，呢班會員各有家族生意或個人事業，平時都係大忙人，難得有個聚會畀大家傾吓偈真係開心。
李文俊（右）當選新一屆百仁基金主席，現任主席施榮忻（左）亦放心交棒。
中藥公司太子女王文博（左）與羅氏針織太子女羅穎怡（右）傾得好投契。