政壇：搞搞政：張炳良搬屋成日執書

新一屆政府房屋局局長大熱人選張炳良早前已宣布辭任香港教育學院校長，尋日佢最後一次以呢個身份同記者聚會，張炳良透露忙緊搬屋，不過搬離校長宿舍都有唔少煩惱，事關佢住緊嘅校長宿舍有成過百本書要搬走，仲有一大堆香港政治、政黨發展、六四事件等剪報，佢唔捨得唔要，搞到執極都執唔完，俗語都有話上屋搬下屋唔見一籮穀，張炳良想冇損失搬屋睇怕有啲難度。

大家都好關心即將主管香港房屋事務嘅張炳良對房屋有乜新構思，佢話好明白唔少港人都想擁有自己嘅居所，仲自爆喺八十年代買樓上車時，都係左度右度同老婆睇住本紅簿仔做人，供樓用咗家庭收入嘅一半，一個月出街食飯嘅次數少之又少。

即將離開教院嘅張炳良又話，已經向教院師生臨別贈言，仲送咗個有成六、七頁紙嘅「校長錦囊」畀將會署任校長嘅鄭燕祥教授，因為佢預期鄭教授可能要署任一段較長時間，預計招聘新校長最少要九個月時間。