政壇：鄭家純泰晤士河搞地產

候任特首梁振英尋日宣布扶貧委員會籌備小組名單，商界暫時只見新世界嘅鄭家純上榜，政壇得意，純官近排喺商場上都有單大龍鳳，就係變身為「騎士龍」，踩入「水深火熱」嘅倫敦房地產！染指沿住泰晤士河長達一點四英里、佔地成一千四百萬方呎嘅大型發展項目。

倫敦上市地產商Quintain公布，佢同澳洲地產商Lend Lease（LL）各佔一半股權嘅泰晤士河畔Greenwich Peninsula項目，獲純官入股，個項目係倫敦史上最大住宅項目，總值達三十億英鎊，即約三百六十五億港紙。

純官嘅投資旗艦公司Knight Dragon（騎士龍）將會買入LL嘅五成、再買埋Quintain嘅一成股份，成為呢個超級項目佔股六成嘅最大股東，但無透露作價。未來「騎士龍」會注入一點五億英鎊（約十八億三千萬港元）現金，又提供三億英鎊（約三十六億五千萬港元）信貸。