政壇：肥平未現形先捱轟

距離新一屆政府上場只剩十日，立法會財委會尋日仲討論緊架構重組嘅建議，七月一號後負責管理政府嘅一眾司局長名單仲係傳聞，一眾泛民議員審議架構重組建議時無視政府亂晒龍嘅危機，會議玩拉布外，一陣嫌問責官員人工高、架構唔清、分工古怪，一陣又刁難問責官員嘅招聘，白鴿黨先係炮轟前中常委馮煒光應徵做副局長，尋日又唔點名批評傳聞係政務司副司長嘅熱門何志平冇政績、唔識溝通，總之想做要鬧、做咗更要鬧。百彈齋主真係好易做。

要求另覓人選

財委會昨繼續審議架構重組，白鴿黨嘅李永達話，嗰位疑似人選過去曾經同佢哋有飯局，大家喺酒店食晏，由十二點半去到兩點，嗰位仁兄都係得個食字，完全無入到正題，阿達認為，佢全程只顧埋頭食飯根本唔識同議員溝通，質疑佢第日點擔任以溝通角色為重嘅工作呢？

阿達一講完，工黨何秀蘭亦認叻爭住爆，話自己都約過呢位局長食飯，明明係一餐公務午餐，但全程一句公務嘢都無講過，仲話嗰位局長好似食得好開心咁。佢直言，呢個副司長人選過去冇乜政績，能力亦欠奉，認為候任特首辦應該搵過個適當嘅人選。

佢哋雖然冇開名，但你一言我一語，「嗰位副司長」嘅特徵已經揚晒，以前做過官、同政黨飯局交往過，何志平三個字可謂呼之欲出喇！肥平喜歡飲飲食食係政界公開秘密，所以一直身形圓渾，份人無咩棱角，估唔到未上任已經招嚟泛民咁多批評，連飯局往事都畀人爆晒添。

自從新政府開始招聘以來，泛民就炮火不絕，一陣唔畀自己人（馮煒光）去應徵，一陣又鬧肯入熱廚房嘅候選官唔夠水準，鬧嚟鬧去、雙重標準，總之鬧人就一定冇錯！