臨收工搞搞震 古諮會大地震

咦，真係辭職喎！真係下台喎！嗱，大家咪開心住，憤而劈炮嗰位熱血男兒叫陳智思，唔係「痛心特首」曾蔭權。

陳智思辭嘅係古物諮詢委員會主席。成件事係咁嘅，港府臨下台忽然狀態大勇，重提清拆政府山西座，搞到滿城風雨，就喺古諮會相關評級投票中，評為二級同一級嘅委員打成平手，要由陳智思一票定江山。結果，佢將西座評為二級，被指同港府打籠通，為清拆西座開綠燈。

政府山爆保育戰，古諮會先變炮灰，陳智思於是辭職，話以免連累古諮會受攻擊，影響公信力喎。另外有四名委員亦共同進退，集體劈炮，古諮會為之大地震，一嘢散晒。

講到呢度，不得不講一句，港府最叻添煩添亂，害人害物，唔到你唔服。老實講，政府山西座應唔應該拆，見仁見智，一時難以達成社會共識。夕陽政府時日無多，喺呢個時候重提清拆，就肯定係有破壞，無建設。當局將政府山變成炸彈，不止炸到古諮會支離破碎，仲搞到全個社會四分五裂添，真係多得佢唔少，叮！

即係咁，港府一係唔做嘢，一做就打爛嘢，古諮會搞到立立亂，佢哋嘅責任一定走唔甩。值得深思嘅係，港府失驚無神走去捅政府山呢個黃蜂竇，到底係無心之失吖，定係特登靠害先？嗱嗱嗱，真係愈講愈奇怪o架，夕陽政府行將就木，新政府上場在即，偏偏喺呢段日子忽然湧現一大堆極具爭議性話題，乜鬼聯匯風波、丁權爭議、焚化爐爭拗……沒完沒了，話背後無人臨收工搞搞震，講都無人信啦！

係喎，曾蔭權實牙實齒講過，會協助新舊政府無縫交接，家陣夕陽政府不斷添煩添亂，社會裂痕愈擴愈大，連古諮會都搞到散埋，煲呔曾該當何罪呀！所以話啫，真正應該辭職嘅人唔係陳智思，而係貪曾！

叮佢個鎯鎯，如果每次無做好呢份工就要辭職，貪曾辭職一萬次都唔夠。單係捲入貪腐醜聞呢家嘢，已經罪該萬死，如果佢仲有少少羞恥之心，早就應該順從民意引咎辭職啦，仲點可能留喺度篤眼篤鼻。最衰就係班立法會保皇黨，餐餐築起人肉長城保曾護貪，一樣係禍港殃民。

事實證明，貪曾多留一日，就害人一日，古諮會搞到雞毛鴨血就係例子。大家炒唔到貪曾，唔緊要，喺九月立法會選舉，一齊用選票復仇，踢走保皇黨，叮！