SUN微博：打橫嚟講：政治見工娛樂化

一早話過香港政治娛樂化o架啦！睇見那班副局和政助去面試之場面，唔知，仲以為佢哋去選港男或亞姐添噃！若非用報紙擋面，就係戴口罩頭耷耷狂奔標上的士鬆人，好似法庭門外，那些色魔疑犯散庭後避上鏡般狼狽。

唉！有資格被通知「面聖」（呀！應該係「面試」），乃是一種「身份」的肯定，起碼是振英哥賞識的人才先啦！兼又證明你能夠明白和認同振英哥的各項理念啦！有本事為香港服務，是偉大光榮嚟嗰噃！使乜咁鬼祟，包到成件木乃伊咁去見工呀？你覺得嚟應徵，好羞家？好卑鄙嗎？問心有愧？

咁又係嘅！做公務員，捱足一世都上唔到位，依家，無很端端，阿豬阿狗有手有腳（有埋後台更掂）都去申請做高薪而不用孭責的副局政助，又真係對啲公務員唔住嘅！稍有少許血性良知者，也應感羞恥，遮遮塊面，又情有可原嘅！但，都唔好搞到好似啲十五歲妹喺K場畀差人帶出來咁肉酸吖！嗱！光明磊落啲，挺起胸膛接受閃燈洗禮，否則，打後日子，點捱呀？如果CY肯請你的話！

香港人窮得要靠大陸親戚自由行去撐起經濟，苦不堪言，幸好，間中，有這些免費的政治娛樂解解悶，否則，怨氣積積埋埋，發洩落領導人訪港時就弊傢伙矣！

政治娛樂化之好處，乃大家唔好將啲政治問題睇到咁重要，做個「娛民」，乜都唔識，只識傻笑，咪幾好！和諧晒！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府

就係敢爆：

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot