政壇：搞搞政：波波臨別為接班人掃雷

立法會會計界議員「波波」陳茂波準備喺七月過檔新政府，尋日特登帶接班人Nelson林智遠出嚟見記者，擺明係為Nelson入立法會鋪路。不過，波波一走，會計界選情必定風起雲湧。

好早前會計界傳出，行會成員劉遵義老婆劉麥嘉軒有意出戰會計界，佢喺特首選委會以高姿態勝出，都咪話冇機會。波波聽到之後就好緊張，即時問劉太係咪嚟真，點知劉太就話冇興趣做議員喎。就係咁，Nelson於是少咗個勁敵，但仍要面對可能會捲土重來嘅龔耀輝同泛民主派嘅梁繼昌爭位。

雖然有波波呢個師傅幫手掃地雷，但自己都要有實力打仗至得。Nelson話自己有「會計界黃子華」嘅外號，啲人聽佢教書同講talk都唔會瞓覺，相信演講能力好過波波，唔怕悶親選民喎。波波就話如無意外七月過檔新政府做官，佢個立法會議席會自動喪失，所以毋須辭職同補選。