政壇：學界投資王22歲賺百萬
中文大學三年級學生蕭輝（Simon），喺今年三月贏咗首個「實時真錢」大學聯校盃投資比賽總冠軍，原來佢十幾歲就開始幫父母投資，期間經歷過金融海嘯蝕入肉，之後佢決定由基礎重新學習技術分析，又緊貼股票圖表趨勢，結果喺二十二歲就賺到人生第一個一百萬。
今年二十四歲嘅Simon，小學時期已去咗新加坡讀書，三年前回流返港，入咗中大系統工程與工程管理學系，今次比賽中，佢以兩萬蚊本金投資，兩個月後賺得一萬二千蚊奪冠。受到經營貿易生意嘅屋企人影響，Simon自細出入各大銀行，熟讀《窮爸爸富爸爸》等致富書籍，亦慢慢對股票市場產生濃厚興趣，佢坦言細個篤股票機仲多過睇卡通片喎！
蕭輝話投資時最緊要留意圖表趨勢，做足市場分析同保本至上。