政壇：拉布戰累橄欖淋巴腫脹
尋日立法會財務委員會審議新政府架構重組，主席劉慧卿即席讀出公務員團體嘅意見書信時，建仔嘅「橄欖」陳鑑林就無啦啦加把口，話卿姐淨係讀出其中一封信唔公平，應該讀埋其他團體嘅意見書喎。
白鴿黨高達見橄欖咁講，即刻話支持佢，仲叫卿姐讀埋其他團體嘅意見書，橄欖到呢刻先意識到講錯嘢衰咗，因為讀意見書都要讀三個鐘，一定蒙上拉布嘅罪名，所以即時收番。
橄欖之所以差啲中伏做咗拉布罪人，相信係因為佢最近做完手術，元氣未回復。話說上禮拜二佢發覺左邊頸突然腫脹，所以即時入醫院割走少少淋巴組織做化驗，好彩至今未驗出有乜嘢事，醫生話突然腫脹主因係休息時間唔夠喎。橄欖就一口咬定係早前應付泛民嘅拉布戰累事，搞到佢夜一夜先至瞓覺。
橄欖上禮拜做完淋巴組織檢驗手術。