政壇：泳池月票小惠貪曾爭邀功

就嚟執包袱嘅貪曾，任內成事不足敗事有餘，更被本報揭發佢貪盡富豪海陸空款待，又濫用納稅人公帑豪華外訪，連串醜聞搞到民怨沖天。貪曾試過藉派糖挽民望，可惜返魂無術，尋日竟然cheap到連康文署轄下公眾泳池月票呢啲小恩小惠都要爭住邀功。

無謂「德政」擾民

康文署下月正式推行公眾泳池月票制度，以月票畀市民任游，本來都冇乜特別，但康文署尋日公布後，貪曾唔夠三個鐘就喺facebook嘅特首辦專頁上硬銷呢單嘢，聲言呢個泳池月票制度係自己喺《施政報告》提出嘅，目標係減輕成日游水人士、特別長者嘅經濟負擔。嘩！講到好似佢先至諗到咁，但其實早喺十幾年前市政局年代已有人提出建議，只係遲遲未推行。

貪曾當正係「德政」咁，但班網民睇到佢叻唔切就火都嚟埋，不停留言炮轟呢個月票計劃係垃圾。有人話各區泳池收費唔同，一節時間由十七蚊至二十蚊不等，如果買咗月票，即係一個月最少游十七次先至回本，所以三百蚊成人月票根本唔會有太多人使用。至於月票計劃特別針對長者，同樣被網民反駁，話長者本身游水已有半價優惠，基本上一百五十蚊長者月票計劃唔係好吸引。

月票另一無謂之處，係冇得喺泳池即場買到，要走去康文署轄下四十二間指定體育館同康樂場地訂場處購買，走嚟走去都叫便利長者？貪曾同班庸官真係噏得就噏。

話時話，貪曾咁鍾意貪小便宜，佢咁急要喺任內推行泳池月票計劃，唔通係要預先製造「延後利益」，方便自己卸任做番平民後，可以日日去公眾泳池游水？