政壇：搞搞政：黎棟國被爆「坐正」三年

政府換屆在即，新任局長嘅名單已經傳到通巷皆知，好似保安局新局長，早傳由現任副局長黎棟國接任，呢個亦幾乎係政圈公開嘅秘密，原來有啲立法會議員覺得黎棟國早已「坐正」，立法會保安事務委員會主席涂謹申更話，每次保安小組開會，都係黎棟國現身，反而身為局長嘅李少光就一次都冇嚟過，難怪阿涂話：「佢（黎棟國）都做咗三年（局長）啦！」

立法會嘅事務委員會係部門同立法會協調專責事務嘅場合，可惜好多局長都係「隱形局長」，唔係搵公務員嘅下屬捱義氣，就係搵副局長頂檔，阿涂坐鎮保安事務委員會多年，見黎棟國多過見李少光，心裏梗係有氣喇。

不過，阿涂擔心局長有鋪唔開會嘅癮，最驚將來黎棟國坐正做咗局長後，又會唔去立法會開會喎。咁多局長之中，阿涂就大讚發展局局長林鄭月娥最勤力，因為林鄭唔止每次開會都出席，就連一啲小組會議都唔會放過，所以佢民望高真係有原因嘅。