政壇：CY忙裏偷閒陪妻睇騷
候任特首梁振英（CY）近日忙於落區同面試副局長，佢太太唐青儀日前喺候任辦見到記者時，就笑言係嚟應徵做梁太，好似投訴丈夫忙到連老婆都唔得閒見。尋日CY完成另一輪副局面試後，就趁周末同埋太太，再加上下屆食物及衞生局局長大熱人選高永文及太太，拍住拖一齊去灣仔會展欣賞女歌手葉麗儀、陳潔靈同著名手提琴演奏家姚珏合作舉行嘅《萬般情．弘．今晚夜》演唱會。
據知，CY一行人喺演唱會開始前入咗後台探班，與三位歌手同樂手傾偈及合照留念，之後仲坐喺第一行正中位置睇騷。不過佢哋絕非濫用特權，查實梁太識咗葉麗儀同陳潔靈好耐，係佢哋嘅忠實粉絲，佢哋梗要留番幾個靚位畀自己老友啦！
梁振英夫婦（右一及右二）同高永文夫婦（左一及左二），約埋去睇演唱會。