政壇：羅太泛民爭辯工資 羨慕死打工仔

立法會財委會正在審議緊新一屆政府嘅架構重組方案，並展開自出缺安排後嘅第二場拉布戰。泛民主派對新架構建議諸多不滿，提咗大量動議攔截，尋日傾到開支時，白鴿黨嘅甘乃威同工黨嘅李卓人以狙擊姿態，狂轟現任官員人工太高，直指管理小小香港嘅高官人工「超英趕美」。候任特首辦主管羅范椒芬即刻反擊話：「相信你問市民佢哋覺唔覺得立法會議員薪酬過高，佢哋都會有咁嘅回應o架！」

李卓人話，一般打工仔一個月先搵到一萬元人工，做三十年先等於啲局長一年人工，仲引民調話市民覺得局長薪酬太高喎，講講吓，阿人直指問責制畸形，質問手豆高薪嘅官員：「你哋好意思咩？」白鴿黨嘅甘乃威都話，港府問責官員嘅薪酬相等於英國及美國內閣官員嘅兩倍，但負責嘅工作卻遠遠不如，極唔合理。

暗寸議員物非所值

羅太理性咁回應問責官員嘅薪酬係按機制之後，以其人之道還施彼身，叫阿人去做吓民調，問市民覺得議員人工係咪過高？暗示市民一樣覺得議員物非所值。其實，議員指摘官員表現差，薪酬與工作表現不相稱，佢哋自己咪又係面臨唔開會、識彈唔識做嘅指摘？

講開人工高，近日新一屆政府高調請副局政助，間接證實政府工人工高，高到吸引泛民政黨人才投懷送抱，一向反政府嘅白鴿黨爆出中常委馮煒光求榮申請副局、繼而退黨嘅事，公文袋亦爆出蔡海偉拜拜嘅尷尬事，兩黨尋日老羞成怒，喺財會上狠批政府請副局唔保密，令到應徵者好尷尬。記得○八年當局擴大問責制招聘首批副局同政治助理時，喺陽明山莊落閘揀蟀，畀班泛民鬧爆政府黑箱作業、揶揄班應徵者個個唔見得光，依家佢哋自己有黨員應徵畀人影到，又立即變臉呱呱嘈，咁算唔算輸打贏要、雙重標準呢？