黑灰白：初歸新抱 落地孩兒

封建家庭禮教森嚴，新抱入門，姨媽姑姐都會勸告家婆，必定要在入門之日，對新抱嚴加訓斥，曉以厲害，以免日後新抱專橫，家婆無地可企。如此橋段，粵語片中常見。新抱應付之法，一是暫時啞忍，逆來順受，日後再作打算；或者是一開始便擺出刁蠻新抱姿態，將家婆逼到靠邊站，以後家婆要唯新抱之命是從。

今日新抱尚未入門，恃寵生驕，先差遣惡僕上門同未來家婆講數，指定多少日內要將全屋按照自己意思重新裝修妥當，並要增聘婢僕，侍候居停；家婆欲要問明底蘊，惡僕已經出言不遜，畀面色家婆睇，家婆自然發火，未入門已經惡成咁，第日入咗門如何得了？於是講明絕不畀面，點解要買張櫈仔都要講得一清二楚？新抱要脅話傢俬唔買齊入咗門就唔包生仔，家婆話生唔生仔同買唔買張麻雀枱無關。鐵掃把遇着石地堂，雖然吉日將屆，雙方仍然相持不下。

其實，日後頭家係由新抱話事，間屋也確實需要裝修，婆媳之間亦都無事不可談，依家搞到面左左，老襯變冤家，何苦來哉？本來家婆是長輩，也是明白人，新抱入人門，好應保存長輩顏面，之前打足招呼，然後和顏悅色，在親朋戚友面前做場好戲，家婆只要面上有光，肯定會順從新抱要求，使一億幾千萬又有乜所謂？

如今大家都落唔到台，請帖又已經派出，連證婚人都做定新衫準備光臨贈興，間屋睇怕也是裝修唔切，新抱惟有死死地氣入咗門至算，反正到時生唔出仔便唯家婆是問，鬼叫佢依家在此阻頭阻勢，蹉跎歲月？新抱報仇，三月未晚，等到奴家一旦當家，睇你個冥頑家婆惡得幾耐。

家和萬事興，未過門婆媳關係已經搞到咁，日後唔知點算，怕且要搵個社工返嚟幫手調解一下咯。