賴死主禮教學獎 貪曾厚顏世無雙

人人都話曾蔭權厚顏無恥，到底佢有幾厚顏、有幾無恥呢？

先講無恥吖，貪曾都算係極品㗎，貪威識食、以權謀私、揮霍公帑、涉嫌貪腐……何止窮奢極「恥」，簡直就係「香港之恥」！

至於厚顏咯喎，貪曾更加係得天獨「厚」。最簡單，佢唔厚顏就唔會淪為過街老鼠都唔肯辭職落台，賴死到最後一分一秒啦。

貪曾舔到盡係人都知，只係估唔到佢厚面皮成咁。港府一哥個位已經賴死唔走，連頒獎主禮一樣趕都唔走，死都要出嚟獻世。

係咁嘅，港府年年舉辦「行政長官卓越教學獎」頒獎禮，嘉許傑出老師，而今年將於今日舉行。你知啦，貪曾醜聞纏身臭名遠播，所以教育評議會公開要求佢引咎缺席頒獎禮，以免玷污卓越獎，玷污教育界。

教育評議會講得啱o架，教師春風化雨，教導學生修身立德，但係貪曾無潔身自愛，貪腐醜聞爆完一單又一單。如果卓越教學獎由佢主禮，唔止係天大笑話，直頭係天大諷刺。

好嘞，大家估下貪曾有乜反應？新聞處尋日出稿公布，貪曾如常出席頒獎禮！嗱，呢啲咪叫唔知醜囉！貪曾企硬亮相頒獎禮，話之你哋嘈到拆天，吹咩！

叮你個鎯鎯，貪曾呀貪曾，你叫教師以後點樣教學生呀？呢頭叫學生要廉潔奉公，嗰頭港府阿一貪婪無度違法失德；呢頭教學生香港係三權分立、互相監察，嗰頭立法會政客就保皇護貪沆瀣一氣；呢頭勸學生守禮義廉恥，嗰頭教學獎嘅主禮嘉賓係一個寡廉鮮恥之徒，面皮厚到電磁炮都射唔穿！

再講一次，貪曾罪孽深重，佢勾搭富豪黐飲黐食，摧毀禮制；趨附權貴懶理窮人，不仁不義；奢豪外訪浪費公帑，無視廉德；貪腐枉法濫權營私，無恥之極。一個不禮、不義、不廉、無恥嘅人，絕對無資格主禮教學獎！

貪曾係都要出席教學獎頒獎禮，不如咁啦，教育組織臨時頒個「行政長官卓越貪腐獎」畀佢，等佢當眾出醜，亦為全港學生上一課，就係人必自侮而後人侮之呀，叮！

其實，貪曾無禮義廉恥，何止唔應該上教學獎頒獎台，更加唔應該留喺禮賓府，快快滾蛋！至於立法會班禮義廉政客，各位市民記住，喺九月立法會選舉用手中選票踢走佢哋，咁香港政壇就一天都光晒，叮！