SUN微博:Sun畸事:第一貪威男(你懂的)
一項調查發現,男士也愛瘋狂購物減壓,隔三周換手機、不間斷買新車,除了債台高築和浪費外,更造成病態般的依賴,泥足深陷,無法自拔。今次Sun畸事好榮幸請到負責今次研究的社工以及一位深受其害的求助者,為大家現身說法。
社工:觀眾朋友大家好!今次我會同大家講吓男士購物狂,呢度就有一位人辦……呀,唔係,係求助者,化名叫貪威男。貪威男,同大家打個招呼吖!
貪威男:大家好,我係貪威男。
社工:貪威男,究竟係咩原因令你變成咁?
貪威男:其實我見人哋成日換手機,畀人讚「手機博士」,自己都好想好似佢咁,有人認同……
社工:即係人有我有心態啦?你係唔係覺得咁樣就換到真正嘅朋友番嚟?
貪威男:都係o架,多咗好多朋友陪我飲飲食食遊船河咁。
社工:但係啲朋友喺你落難時候,又有無喺你身邊支持你呢?
貪威男:咁又有喎,有個法官朋友幫我擋晒刀孭晒飛。
社工:吓?咁你又會嚟求助嘅?
貪威男:問題係我唔鍾意手機又或者換車。
社工:咁你鍾意咩?
貪威男:我鍾意人哋叫我「菜心肥雞爵士」。
社工:!@$*%$&*︿$&*
(花生友如有對號入座,請食自己)