理工大學尋日舉行時裝展，大騷紡織及製衣學系畢業生出爐嘅作品，場內見到時裝設計師協會副會長馬偉明，問點睇業界前景，佢慨嘆香港近年來都冇誕生出色嘅設計師，點解？佢笑言：「曾蔭權本身都唔鍾意時裝，你睇吓曾太嘅衣着就知啦！」
馬偉明話近年舖租咁貴，想創業真係難。要推動創意藝術，政府嘅角色好重要，但曾蔭權自上任以來，完全忽略本土文化發展，好似活化建築作藝術用途咁，做極都冇乜成效。佢對即將成立嘅文化局寄予厚望，最想設立創業基金畀年輕人發揮所長。
馬偉明（左）批評曾蔭權忽視本土文化。右為羅絲集團創作總監張路路。
理大畢業學生作品創意無限，獲得一致好評。
