政壇：林公公讀書老婆幫煮飯
政務司司長「林公公」林瑞麟上月正式宣布唔會留任下屆政府，卸任後會去英國牛津讀神學。佢尋日喺新政府總部二十五樓舉行告別酒會，宴請全體立法會議員、各區區議會主席同傳媒。佢話一年後會返港傳道，但就未必會再從事公職嘞！
林公公睇嚟好輕鬆，佢話七一後會先同太太飛去英國搵屋，跟住會短暫返香港處理私事，之後再返英國等開學。佢話十年八載前已有讀神學呢個諗法，又話政治問責官員最多只會做兩屆，多過兩屆係「絕無僅有」。佢之後有啲感慨咁話辛苦多年終於供完兩個女讀書，依家輪到自己供返自己讀書，又笑住話同佢一齊去嘅太太會負責洗衫煮飯。
最後佢又分享三十幾年嘅從政心得，話政治上嘅風雨總會過去（All things come to past），又話「出外靠朋友」，朋友對從政者嚟講係好重要o架喎！
林瑞麟（右）去英國讀神學，太太負責洗衫煮飯。