政壇：申請政助馮煒光有份？

仲記得當初唐唐選特首，大家都估白鴿黨有機會加入管治核心，但當時主席鐵頭仁已信誓旦旦講過，一日未有全面普選，白鴿黨都唔使旨意加入管治團隊。但近日有消息傳出，該黨最少有四人申請做副局長同政治助理，部分人更係夾埋一齊寄信，似係有組織。

擔心「人言可畏」

我哋問咗好多白鴿黨友都話冇申請，直至問到南區區議員馮煒光，開始有啲端倪嘞。呢位講明想選超級議席，但最終缺乏黨內支持而放棄競逐嘅白鴿中人，一聽到我哋問佢係咪申請咗做副局同政助，佢即刻話忙緊公事，然後收咗線。之後我哋用手機短訊直接問佢「有申請定無申請」，佢就回覆話「唔好亂寫，黨內會好煩」，之後仲引用已故女星阮玲玉名言「人言可畏」嚟做結尾。做開公關工作嘅佢，以一個既冇肯定，亦冇否認嘅答案回覆，真相係點大家心中有數。

點解班黨友會咁大膽違反黨規？據了解，原來班乳鴿唔係諗住飛黃騰達，而係諗住「衝關」，試吓寫住白鴿黨牌頭，睇吓候任特首梁振英有乜反應，但馮煒光咁驚人言可畏，可能唔係基於同一原因申請。