政壇：罐頭議案塞爆立會

今屆立法會會期仲有大約一個月就會結束，所以每周大會會先處理政府提交嘅法案同決議案，之後會開始處理議員法案同議員議案。立法會喺今個禮拜三會繼續審議競爭法修正案，下周三處理新政府架構重組決議案，而二十七號就會恢復《2012年商品說明（不良營商手法）（修訂）條例草案》同《一手住宅物業銷售條例草案》二讀。

20議案起碼傾60粒鐘

喺所有政府法案同決議案處理完畢後，立法會就可以開始處理議員提出嘅議案。今屆積存要討論嘅議員議案同休會辯論加埋仲有成二十個，全部變晒「罐頭」未開始討論，排緊隊嘅包括有六四事件同盡快落實制訂標準工時等。

工黨主席李卓人原本諗住喺六四二十三周年前夕，一如既往咁討論六四事件，但由於畀議席出缺安排拉布戰拖垮，議案嘅時效性已經過晒期。不過，由日前有成兩萬幾人去中聯辦悼念李旺陽嘅情況睇嚟，議員可能轉變話題。

如果估計一個議員議案可以喺兩至三個鐘內完成，二十個議案起碼都要傾差唔多六十個鐘，再加上每屆立法會完結前嘅致謝動議，根本就冇可能全部喺七月嘅兩次會議內完成。

所以排得較後嘅動議，例如經濟動力林健鋒要求討論點樣可以維持本港有利營商環境、林大輝講中小企、陳鑑林嘅改善公營醫療服務同埋何鍾泰講嘅雷曼報告，仲有啲係討論促進家庭和諧同推動動物權益及盡快落實制訂標準工時等，全部都變成過期「罐頭」，有啲就只係「口水騷」，真係揼晒落垃圾桶，都唔會覺得可惜。

其實依家剩番嘅議案好多都冇迫切性，如果有議員肯成人之美，主動撤回一啲冇咁重要嘅議案，立法會就可以騰出更多時間處理其他有意義嘅議程喇。