玩拉布護貪曾 保皇黨禮義廉

議事堂上烏煙瘴氣，保皇黨為咗包庇貪曾，玩拉布，出蠱惑，簡直醜態畢露。堂堂立法會淪為維護貪腐嘅垃圾會，香港廉潔形象一鋪清袋。

曾蔭權爵士貪腐醜聞愈揭愈臭，唔止傍住富豪黐飲黐食，仲利用公帑豪遊列國，唔貴唔住。泛民議員前日喺內務委員會提出三項動議，要求煲呔曾「回水」及引咎辭職，點知建制派議員居然與民為敵，聯手拉布，利用雞毛蒜皮嘅議題輪流發噏風，打時間消耗戰，結果三項反貪動議連傾都唔畀傾。

自稱民意代表嘅議員竟然不分是非，自甘墮落，為貪官保駕護航，簡直不知所謂。有人話，香港冇政治家，只有政客。其實計太一叮話齋，保皇議員護貪不擇手段，厚顏無恥到連自己嘅靈魂同良心都可以出賣，人格徹底破產，做政客都未夠資格喇，叫佢哋做政壇垃圾就差唔多，叮！

保皇黨恃住人多勢眾，築起血肉長城保護貪曾，連素有大懶蟲之稱嘅李國寶、黃宜弘之流都由頭到尾坐到足。最好笑嘅係，呢班平時絕少發言嘅政客護貪心切，個個爭住大發歪論，連「貪曾出差住得太寒酸，會影響香港體面」咁荒謬嘅說話都講得出口，問你服未。

更肉酸都仲有。有保皇政客早幾日仲懶正義咁大鬧貪曾醜行「天理不容」，突然又變身成為拉布幫兇。仲有吖，有人講到冇嘢好講，夠膽死拖埋前朝港督同前任特首落水，反指審計署唔應該淨係批評貪曾濫用公帑，應該同前任比較先至公平喎。喂，唔通前人揮霍後人就可以跟住揮霍，前人貪污後人就可以跟住貪污，呢啲究竟係乜嘢混帳邏輯吖？

人在做，天在看，保皇政客點樣包庇貪曾，市民有目共睹。佢哋錯判形勢，與民為敵，借用美國前總統克林頓嘅講法，係企喺歷史錯誤嘅一邊，根本就係政治自殺。無論奉命保皇又好，擔心有人可能爆大鑊同歸於盡又好，佢哋注定成為歷史罪人。

總而言之，煲呔曾好快就要執包袱滾出禮賓府，九月份又有立法會選舉，而針對官商勾結嘅「秋天行動」又蓄勢待發，到時貪曾自然有人搵佢算帳，至於維護貪腐嘅保皇政客咯喎 ，市民一定要佢哋票債票償，付出政治代價。出得嚟行，預咗要還，包庇貪官，天理不容吖，叮！