政壇：群丑保貪曾九月現眼報

立法會內務委員會前日群魔亂舞護貪曾，喺建制派聯手拉布同投票下，否決即時討論民主黨提出嘅三項反貪曾動議，連傾都唔畀傾，非常醜陋。其實前日內會一共投咗五次票，綜合五次投票，有三名建制派議員由始至終都投反對票死撐貪曾，佢哋就係經濟動力嘅梁劉柔芬（蘇菲梁）、廠商會嘅林大輝同新民黨主席葉劉淑儀，蘇菲梁同大輝堅貞保皇，蘇菲梁嘅黨友林健鋒仲衰，四次投咗反對票護曾，到最後一次投票又唔敢表態改投棄權票，保曾都保得樣衰過人！九月選舉在即，選民真係要擦亮眼睛呀。

除咗呢四大保皇議員，自由黨三名議員劉健儀、張宇人同方剛，以及專業會議何鍾泰同劉秀成，行為亦同樣醜陋。其中張宇人、方剛、何鍾泰同劉秀成，尋日明明喺立法會出現過，但偏偏去到表決五項反貪曾動議時就集體失蹤，明顯係擔心保曾保得太揚會得罪市民啦。

身兼內會主席嘅劉健儀仲離譜，早幾日佢先鬧過貪曾醜行「天理不容」，到前日主持會議竟然處處偏幫貪曾，尋日佢又再變身，喺銅鑼灣擺檔做騷，話要收集市民對貪曾下台嘅意見。其實要求貪曾下台嘅民意早已非常清晰，再收集民意唔係想「抽水」，就係蒙騙選民。至於最早提議彈劾貪曾嘅旅遊界謝偉俊，亦缺席晒五次投票，等同死撐貪曾，莫非唔怕選民要佢票債票償？