政壇：CY搵啱接班人 李少光走得放心

新舊政府交班已進入尾聲，但新架構官員誰屬仍然似霧像花，正當唔少現任官員對去留問題欲言又止、模棱兩可時，保安局局長李少光尋日反而好大方咁承認會離任，並話候任特首梁振英幫佢搵到個接班人，令佢可放心離開崗位喎，似乎對交棒畀下手非常滿意，好開心咁迎接人生下一個階段。

現任政府嘅問責團隊中，光哥民望一直相對高，尋日佢出席電台節目時明確話會淡出江湖。喺港府做咗三十八年半、做局長大約九年嘅光哥話，佢嘅年紀已經超過公務員退休年齡，覺得係時候要停一停，言談間，佢又話覺得過去對家人少咗啲關顧，想離任後畀番啲時間家人喎。光哥仲話，將來佢都會好樂意「以唔係做官嘅身份」繼續服務香港、服務國家，似乎佢暗示將來嘅動向可能同國家事務有關喎。

難忘世貿部長會議

講到任內印象最深刻嘅，光哥話分別係世貿部長級會議及《截取通訊及監察條例草案》嘅立法工作。佢仲寄語繼任人，要本住為社會服務嘅心，領導各支紀律部隊，令香港成為一個安全自由及和平嘅城市，盛傳接棒嘅現任副局長黎棟國收到未？