學生被迫做屈蛇 教育產業純吹水

大學生成為屈蛇，校園淪為難民營，香港今鋪真係斯文掃地咯。

太一叮講緊嘅係香港教育學院，呢間培養未來教師嘅院校，宿位嚴重不足，就算將士多房變宿舍，二人房改三人房，十人房住夠十二個，甚至連公眾地方都用埋，一樣僧多粥少。導致未獲分配宿位嘅同學經常被迫屈蛇混入宿舍，瞓梳化、打地鋪、電腦室座椅當睡床，各適其適，乜都有齊，甚至連廁所都爆晒棚，咁嘅校園都算得上「世界奇觀」咯！

唉，有頭髮邊個想做瘌痢吖。教育學院位處大埔偏僻地點，交通不便，學生宿舍長期一位難求，而校方為咗大學正名擴充課程，加上嚟緊嘅大學雙軌年，收生激增，但宿位就冇加到，總共得二千個咁大把，申請同學超過二千五百個，結果梗係爭崩頭啦。

大學教育資助委員會話喎，教院資助學位生唔夠二千人，拒絕撥款起新宿舍。實情係，加埋自資學位同內地生，宿位需求遠遠超過呢個數，僧多粥少咯喎，咪搞到七國咁亂囉。

叮！咪以為宿位短缺淨係教院至有呀，其實類似情況喺本港院校相當普遍。連大學教育資助委員會主席都承認，就算計埋今年九月全港院校新增嘅六千幾個宿位，數字離實際需要仲有好大距離。即係話大學「四年一宿」目標，只係齋噏，咪當真呀。

教育關係到香港未來，學生宿舍明明唔足夠，當局居然視若無睹，簡直不可思議！最離譜就係，煲呔曾政府對增加教育經費斤斤計較，但對貴族學校就有求必應。嗱，好似今年九月開學嘅哈羅香港國際學校咁，獲批四十萬平方呎、估價高達六億元嘅優質地皮，代價只係向港府繳納一千蚊象徵性地價，同免費使用冇乜分別。

港府大細超，一方面慷納稅人之慨，向貴族學校提供資助，擺明車馬輸送利益；但另一方面，大專院校希望增加宿位，當局就不情不願，限制多多，簡直豈有此理。特衰政府嫌貧愛富，唔怪得貧富懸殊愈來愈嚴重，深層次矛盾愈來愈惡化喇。

有句潮語叫「不要輸在起跑線上」，煲呔曾成日吹水發展教育產業、打造區域教育樞紐，點知大學宿位嚴重短缺，當局闊佬懶理，所謂教育產業，純屬吹水唔抹嘴。話時話，大學生做屈蛇慘過難民，自己先輸喺起跑線上，香港有乜資格發展教育產業吖？叮！