政壇：政商定格：李慧琼波衫配平底鞋露底
歐洲國家盃開鑼前夕，建仔副主席Ann蔣麗芸同Starry李慧琼尋日喺深水埗硬地足球場開記招，公布「愛踢波，唔賭波」嘅問卷調查。為加強說服力，佢哋仲分別穿上法國同西班牙球衣扮球迷，又有前香港足球先生山度士撐場。
本來成個記招都似模似樣，點知喺大合照時，有人發現Starry着咗對OL嘅平底鞋，而唔係波鞋，當堂露晒底。佢解釋着平底鞋喺因為之後要去立法會開會，又話着西班牙波衫係因為鍾意紅色喎。
事後被問到鍾意邊隊國家隊或球隊時，阿Ann諗咗陣先講得出鍾意法國隊，似乎唔多在行。有在場人士笑言，或者一切「錯有錯着」，可以加強宣傳反賭波嘅說服力喎！
李慧琼着晒波衫反賭波，但就配咗對平底鞋好古怪。