政壇：搞搞政：門常開塞唔落副司長

添馬艦新政府總部又有甩漏，就係設計時冇預留足夠「走盞」空間，導致未能完全安置新政府架構重組後嘅部門，到依家都未知點收科。據聞現屆政府諗咗條屎橋，打算將新增嘅副政務司司長同副財政司司長暫時安置喺中環舊政府總部，變相將新政府斬開辦公，夕陽政府搞交接搞到唔湯唔水真係好離譜。

據聞候任辦公室都感到不滿，事關冇理由要新政府部門分開喺兩個地方辦公。我哋就此問過候任辦，佢哋話新政府辦公地方現正安排緊。

但盛傳擔任下屆副財政司司長嘅現任立法會會計界代表「波波」陳茂波話冇位坐嘅話可以「坐冷巷」喎，仲話若要喺舊政府總部做嘢都係個可行辦法，事關兩處地方距離唔遠，往來都算幾方便喎！

波波就話塞唔入新政府總部冇所謂啫，但同一地點辦公係關乎新政府班子嘅完整性同辦事效率，試問新政府又點會收貨呢！假如當初唔畀貪曾搬去新總部，要佢喺舊總部辦公得唔得吖？所以話呢，做事要過得自己過得人。