港商借勢掘金賺到笑

歐洲國家盃殺到埋身，擅於發掘商機的香港人，必定會趁這個機會搵真銀。酒吧、夜場及商場皆準備就緒，迎接這項4年一度的大賽，售賣球衣的店舖更加門庭如市，快人一步「賺到笑」。

酒吧生意額至少升兩成

酒吧經理Kenny表示，過去歐國盃或世界盃期間，酒吧生意額至少上升兩成，實際盈利則要視乎各支熱門隊伍的成績。位於灣仔利景酒店地庫的餐廳酒吧Champ's，是最多球迷聚腳地點之一，經理Kenny謂臨近歐國盃，香港睇波熱潮升溫，客戶訂位情況相當理想，特別是強隊林立的B組賽事，可容納二百人的場地預計會連場滿座。至於C組、D組有西班牙及英格蘭等擂台躉，亦有穩定客路，若這些「港人愛隊」順利殺入決賽，到時酒吧肯定擠得水洩不通。

商場直播球賽變睇波熱點

本港多個大型商場，於歐國盃期間都會變成睇波場地，觀塘apm、奧海城及屯門市廣場都會有直播。apm商場每逢大型足球賽都是市民睇波熱點，nowTV將在商場大堂播放包括揭幕戰及決賽等6場賽事，同時亦有直播派對及歐國盃球衣展覽。奧海城將於二期地下主題中庭，播放8強至決賽，顧客只要消費滿$200或以上，便可換領直播區入場證。屯門市廣場則在中央廣場搞直播活動，由揭幕戰到決賽免費播足31場。

球衣店提早部署搶頭啖湯

位於旺角的球衣專賣店「自由球」，早於半年前已着手部署，16支決賽周參賽隊伍波衫齊全。店主奧古表示，銷量最好首推德國，然後是西班牙及荷蘭，法國亦意外地好賣，他表示：「德國球衣最多人熱捧，除了今屆最有捧盃機會之外，球衣設計亦先勝一仗，特別是德國作客球衣，甚具70年代復古味道，吸引許多球迷選購。」雖然熱門球隊波衫有價有市，但若不幸提早出局，屆時球衣亦要割價求售。